人到中年感到前路茫茫， 我係103 學生，職業做游泳教練，於私人泳池教授二十年，希望可以一直做到退休，但好景不常，公司轉手，計私人及泳班，已只剩1/3收入。

近兩年環境接近半失業。多年教水，感覺身體越嚟越差。 5年前入手保費融資方案，希望可產出利息，今月終於過罰息期，但加息因素，現計仲蝕貸款利息十多萬。 

債基今年E餐三月蝕廿萬，現持有60萬B 餐， 每月收息約7千 有一層土瓜灣舊樓，樓齡44年，每月月租收入12,000 ，供款約7千左右，欠銀行130萬 。其實唔知可以同邊個講，壓力好大，又唔知可以點做。

答:

【窮爸爸富爸爸】呢本書大家應該不陌生，本案讀者就是體現了其象限之困局，無早早改變自己象限而令自己感到不安，睇完本書應要學埋點用。

先講投資執行上，讀者應是過份投資，任何投資買得太多，都令你冒上單一風險。債基B餐由三月大跌市持有到現在，另一隻E餐焗賣減磅，說明想要債基派息但頂唔到槓桿後跌幅吧。因此槓桿水平最好在1.5倍內，切勿將大部份現金壓注債基收15%高息，可以出資一半去買，或者問銀行拎了OD，才投入更多錢去買。

唔夠工開有債基B月派7千增收入，加上土瓜灣樓12K-7K=5K正現金流幫補，點都好起碼每月有萬餘元落袋。富爸爸書本提出4個搵錢象限:

一是打工搵錢，大部份人做緊。而幾十年後諗sir認為未必再咁多人打工

二是自僱，好似讀者咁教水

三是做生意，利用資本請人再產出收入，諗sir而家做緊。或者應該只係學緊。

四是用資本去投資於他人賺錢，即係你見誠哥同一眾富豪成立創投基金搵野黎投，就係呢d

諗sir唔認為買股票屬第四步，各位大哥千祈唔好認為買下股票就係完成了四步。一間公司既股票上到市，股份的價值已被原生股東透支得七七八八，唔好太大期望。在【窮爸爸】書入面亦提了第四象限可以入法避稅的好處，不過由於香港稅率根本低，所以此部份不適用。

明顯讀者就是留在第二象限的Comfort zone，無再晉升成第三象限，那自己一個死打爛打，真係再鋒利既刀都有生銹一日。加上今次疲情專打擊人對人教授項目，更添慘情。將而家美好生活去用「一心諗住直做到退休」既直線思維project，更種下禍根。

其實做得游水教練即係手上有批小朋友客，佢地會唔會需要拍些型既水底拍攝既片去交功課? 而家網上瀏覽量都在video那邊。執返靚自己第二象限盤數，再比多啖氣捱上第三象限，才令自己護城牆更高，更能為家人擋風雨。

至於保費融資因持續低息環境，未能提早派高息。幸好讀者過了罰息期，可隨時拎返而只要照擺可回本之餘未來更有派息，應該點差都唔會差過獅子定期0.49%掛? 其實又可唔可以咁? 

不如自己開公司做教水或相關活動，拎正牌用公司出糧比返自己，亦可用公司名義買債基提供收入，令自己的入息證明增強? 從而合規令個人借貸力變大可加按土瓜灣樓? 該樓只欠130萬，而九龍樓點都市值400萬掛? 咁咪又多舊錢傍身? 至於保險的錢現已可隨時提取，只不過提了就沒後來之高息機會，讀者有錢可用不見得需太懊惱。