近來交通大混亂，唔少上班族都獲安排Home Office ( 在家工作 )。甚至有企業發現行得通，開始考慮讓同事選擇Home Office，順便搬去細Office節省租金。如果你都準備投入在家工作模式，首要考慮係家居原有布置係咪適合做Home Office。  

工作站不可少 
終於可以擺脫每日趕返公司生活，唔少人即時反應係在家工作，當然係躺在沙發或睡床上用Laptop做嘢先夠Hea夠爽。  理論上你人在家中，選擇賴在沙發或瞓在睡牀工作，你老細唔知亦管不到。不過賴在沙發工作，你多數都會開着電視，再開一、兩包零食，如意算盤係一邊睇電視一邊食零食一邊工作，結果很快就變成邊睇電視邊食零食，而將工作擺在一邊。  

撻在牀上工作則更危險，特別係食完晏之後，飯氣攻心之下，你很容易就把Laptop放在一邊瞓個晏覺，不用說到醒來時已經係五、六點，工作未完成老細又搵你唔到，Home Office就成為你被炒的導火線。  

既然後果可以咁嚴重，投入Home Office第一步就應該在家中組建一個工作站。這個工作站基本要有一張枱及辦公椅，最理想係配置一張有充足桌面空間的書枱，再加上一張以人體工學設計的辦公椅。似乎特別添置新家具有點「肉赤」，但換個角度諗，平時你公司張枱同辦公椅無得自己話事，現在卻可以按自己喜好選購，其實都係Home Office樂趣之一。  

不過居室面積有限，係大家的難題，假如你屋企放了餐桌就沒有地方配置書枱的話，亦可以變通一下，利用餐桌充當書枱。唔想餐桌與辦公椅太唔協調，可以選擇有舒適椅背的餐椅，再加一個護脊靠背墊便可。你亦可以選購一個漂亮的三至四層文件櫃，放在家居辦公桌上，既可以分類擺放文具、文件及信件，亦可以為Home Office增添一些工作感覺。  

兩項值得投資裝備 
平常在公司用Laptop工作的你，可以都會認同整日屈身對住Laptop，頸及背都會痠痛。因此最好添置一個防藍光LED芒，反正千多元有交易，再加一個藍芽鍵盤，就毋須再屈身對住Laptop工作。  

另一樣值得投資係靚聲藍牙喇叭，唔一定要智能喇叭，接駁到電腦已經夠。考慮到現在唔少人屋企都無Hi-Fi，有了這個藍牙喇叭，工作時就可以開一些自己喜歡的音樂，心情輕鬆一些，自然更容易在家中投入工作。

文：Peter Cheung