辦公室戀情對你嚟講係好事定壞事？打工仔一個星期至少工作五日，對同事多過對朋友同屋企人，朝見口晚見面一齊食飯得閒圍爐取暖，好容易就會擦出火花。有打工仔認為喺公司拍拖伴隨住好多風險，正所謂「喺度食唔好喺度屙」，但愛情來到又係咪要忍痛放棄？

喺The University of Texas at Austin任教嘅心理學及市場學教授Art Markman係咁講：「日日花咁多時間喺工作上面，如果願意開放自己同同事拉近距離，分享多啲自己嘅苦與樂，有進一步發展都好正常。（You spend a tremendous amount of time at work and, if you put people in close proximity, working together, having open, vulnerable conversations, there’s a good chance there are going to be romantic relationships.）」仲話有唔同嘅研究指出，人係傾向鍾意同自己相似嘅人，你對嗰個人愈熟悉，就愈容易被佢吸引，簡單啲講就係大家喺同一間公司氣質差唔多，日日對住會日久生情咁解。

但當然，喺Office拍拖，要考慮同注意嘅事項都唔少，一齊睇下！

事項一：先了解有咩風險

利益衝突：

當公司派咗個Project畀你in charge嘅時候，而你嘅男/女朋友同你同一Team，會唔會畀同事話你因為想優待你嘅伴侶，而犧牲咗其他同事嘅利益？

聲譽風險：

假如你係同上司拍拖，你嘅升遷會唔會為人詬病？點樣先畀人睇到升職係憑努力而唔係靠關係？仲可能會畀同事話你動機不純。

情緒影響：

拍拖無問題當然最開心，但一旦有咩拗撬大家面阻阻，甚至分手，仲要日對夜對，要處理情緒專心工作都唔係咁易。

事項二：點解想開始呢段關係？

戀愛關係最好係無雜質，如果你係單純想搵一個可以同自己行埋下半世嘅人，相信對方都會感受到，你哋嘅同事都會祝福你哋。但如果你係動機不純，希望藉住發展一段關係而喺職場或者仕途上得到啲咩好處，會建議你：「收手啦，施主。」要記住，喺Office有幾十對眼望住你，有咩唔開心對你嘅影響都唔會細。

事項三：公司有無明文規定？

打工仔一睇可能會諗：「下，校規咩？」當然唔係啦，大家都成年人。然而，公司有公司嘅考慮因素，並唔希望因為員工嘅私人感情狀況影響公司嘅生意同運作，所以有啲公司會喺員工守則（Employee handbook）入面表明，如果員工同同事、供應商（Vendor）、客戶有工作以外嘅關係，係需要進行申報，千祈唔好諗住可以隱瞞，早啲坦白公司對你嘅印象會好啲，存心隱瞞反而會影響你嘅仕途同觀感。

事項四：對象盡量避免係直屬上司或者下屬

咁樣可能係好專制，但同直屬上司或者下屬拍拖係普遍被認為利益衝突最厲害嘅事。又年尾喇，做Appraisal嘅時候有無可能做到客觀？你嘅努力能唔能夠被公司/ 同事認可？同事會唔會覺得你係特別被優待？

當然，如果一齊咗都無理由出警告信叫你哋分手，不如試下申請Internal transfer，跟過另一個上司？咁問題就可能解決到。

事項五：盡早公開關係

可能你會覺得：公司邊有秘密吖～但往往唔係咁多人咁心水清，尤其係你上司。一來紙係包唔住你哋熊熊嘅愛火，二來與其等上司拆穿，不如早啲申報利益，等上司安排工作嘅時候可以有多啲考慮。設身處地去諗，假如你有兩個下屬打得火熱，你會想佢哋做埋同一個Project定係分返開各有各做減少磨擦？

事項六：留意下自己嘅行為

公司始終係做嘢嘅地方，「過閃」同「過甜」係會影響同事嘅觀感同工作士氣（同同事係咪單身係咪妒忌完全無關！）。工作時工作，遊戲時遊戲，請保持專業做好你嘅工作，而你嘅愛意就放工先釋放啦。

事項七：分手點算？

拍拖唔係包生仔，兩個人相處唔夾又或者其他原因而導致最終分手係正常不過，但喺開始之前，你已經知道個風險喺邊，公司同喺街外唔同，經常日對夜對嘅你將會非常痛苦，非常尷尬，仲要同同事交代你哋分開咗，Office嘅氣氛應該會跌到冰點⋯⋯ 但作為成熟嘅打工仔，唔好韓劇主角上身做任何唔成熟嘅表現，唔好呼天搶地，唔好當面對質，最好表現到好似咩都無發生過咁。如果真係好頂唔順，辭職或者申請調職都係你嘅選項。