打工仔有轉工嘅想法，好多時係因為幾努力都無回報，反而愈努力就愈多挑戰同困難。明明樣樣嘢做到足，同同事相處融洽，appraisal個分數又靚仔，年資又夠，點解升職嘅機會總係擦身而過？可能係Miss咗升職嘅信號！即刻睇下：

1. 責任大咗，工作多咗

明明隔離Team阿強同我同Grade，佢可以做完嘢懶懶閒，而我要做多兩個新Project？係咪老細搵我笨？可能性唔係無，但你喺公司已經一段日子，上司係好係壞應該分辨到。責任同工作多咗無疑無伴隨更多壓力，同時亦係上司信任你嘅signal。做好佢，證明你可以獨當一面！

2. 被要求做新同事Mentor

有新同事加入公司，咩都唔識，老細竟然叫你帶住佢，仲笑笑口咁同你講：「嗱，佢過唔過到probation同你份appraisal掛鉤㗎。」當下即刻心裡大叫伏已中，佢留唔留低你點控制呀？但老細又點會唔知，但叫得你帶新人，就係相信你嘅能力同經驗，知道新人跟你做嘢唔會學錯師，no pressure，放膽去做啦！

3. 上司問你覺得做成點

通常呢啲問題都係「突襲式」等你無得防避，相信有九成都會回應「OK呀」就完，但上司係唔會放過你，又會問「有無咩唔開心呀？」，「有咩訴求呀？」之類（都係升職加人工，仲有咩⋯⋯），當下你可能會諗佢係咪想炒人收定風。但其實平日上司咁忙咁多會開，問咁多唔會無原因，就係喺言語對答上衡量：係咪唔升你就會走？升職又滿唔滿足到你？

4. 上司成日叫你跟出跟入

明明做嘢已經好忙，但上司又係咁叫自己陪佢出去開會、見客、聽Seminar，帶住疲累嘅身軀返到公司做嘢，又無啦啦話報咗個workshop，想你去睇下，當下真係喊出嚟！但做呢啲嘢唔係無原因，而係想你早啲面對客人，知道點樣做pitching，了解多啲市場資訊，等你可以有個準備。

5. 見求職者都預埋你

有一日上司突然叫你同佢見求職者，而個Title係同自己一樣，有無諗過公司想請一個新人去replace你？唔好嚇親自己，上司同HR只係相信你比任何人都清楚明白呢個職位需要一個點樣嘅人，同埋到時你升咗，都要有個人頂返你原本嘅位置㗎。

如果以上嘅事情係發生過，而你無好好把握，咁經一事長一智，下次再努力；如果你正喺呢啲挑戰入面，希望你可以咬緊牙關捱過佢。當然，有部份打工仔比較幸運，上司會同佢直球決勝，直接同你討論升定唔升，記得做足事前準備，寫低自己嘅achievement同埋優點，用嚟解釋Why you deserve it！希望大家成功升職加薪！