6秒鐘你可以做啲咩？斟杯水、send個短訊、睇一個6秒唔知幾多萬嘅TBB廣告⋯⋯6秒對於搵工嘅朋友嚟講可能係一個特別嘅秒數，皆因外國有研究指HR平均只會花6秒鐘去睇一份CV。大家聽到6秒鐘可能會好忿怒⋯⋯

「6秒？你地班HR有冇認真睇㗎？」
「怪唔得全部冇回音啦！」

然後HR喺大家心目中變得更邪惡，全部都係窮兇極惡嘅壞人！

呢個6秒鐘研究結果，相信害到唔少HR畀人鬧。梗係啦！大佬呀，人地辛辛苦苦寫份CV出嚟，6秒就判人死刑，未免太唔畀面。究竟HR係咪真係咁唔畀面嘅呢？

首先要留意返6秒只係平均數，因為HR每日收嘅CV可能多不勝數，當中包括咗好多「搵工漁夫」。 「搵工漁夫」意指漁翁撒網式搵工嘅人，佢地唔埋好醜都send咗先，各方面其實都唔勝任職位本身。HR花喺呢啲漁夫身上嘅時間會比較少，但當遇到有適合嘅CV時，自然會花更多時間進一步研究。正確嚟講，HR其實唔係只用6秒去睇每份CV，研究結果想表達嘅重點係，你份CV必須於短時間內吸引到HR嘅目光 。咁其實最高危被短時間內去除嘅CV，通常係出左咩問題？ 

1. 內容太少

一份完整嘅履歷的CV Checklist，基本都要有齊你嘅個人資料、過去嘅學歷同工作經驗。但有時我地收到嘅求職電郵，點睇都稱唔上係一份履歷，頂盡只可以叫佢做一個message。

「你好呀，我今日寄出這封電郵是希望申請 貴公司的服務員，我喺車厘茄公司有顧客服務經驗。我的電話是21232123，希望可以到 貴公司面試。謝謝：）」

完了。冇附件，乜都冇。另外亦都有一啲只寫做過咩公司，唔寫工作內容嘅情況。工作經驗內容太簡單，幾眼睇完冇料到自然好快byebye。

2. CV不夠精簡

唔好以為寫得多就係好，CV係一個推介自己嘅工具，好用嘅工具一定要user friendly，而你嘅user就係日日負責睇CV嘅HR，所以你必須照顧用家嘅感受。

有啲人有好多嘢想喺CV上面表達出嚟，結果內容越寫越多，份份工都寫成篇文出嚟。冇錯，內容好豐富，但就唔太user friendly。過長嘅CV反映表達、組織能力不足，結果好易被放入回收箱。

3. 歷格式混亂

就算有好嘅學歷同工作經驗，都要寫得清清楚楚先得。有啲CV格式非常混亂，工作冇跟時序排序、內容以文章式敍述、日期格式前後不一等等，令人睇落去感覺混亂，唔駛見都知「呢個人好求其」，結果生存率隨時減半，未打已經先輸了。

4. 錯漏百出

基本上份CV有相關經驗、長度適中，格式又整齊，至少已經可以令人睇多一陣。不過如果被發現有好多錯字、錯grammar、錯日期等等，就證明呢位人兄太粗心大意。好多人一張cover letter走天涯，但send嘅時候唔記得改返申請公司名同職位，其實會幾樣衰，所以要養成send之前睇清楚嘅習慣。

新一年想執靚份CV先搵工？關於CV要留意嘅重點，大家都可以參考返之前寫過嘅文章：CV要講呢啲。