職場上「同工不同酬」嘅情況好常見，再離譜啲，有打工仔呻過自己做咗幾年嘢，人工同新入職嘅Fresh Grad差唔多，真心灰。呢種情況其實提醒緊你係時候轉工啦！想轉工升職加薪，應該點部署先好？點睇自己係咪Underpaid？Expected Salary又應該點寫？一齊睇下！

轉工應該加幾多%先合理？

通常搵工，HR都會要求我哋喺CV寫埋期望薪金（Expected Salary），方便衡量公司嘅預算。根據調查發現，一般轉工加薪幅度大概係15%-20%左右，如果申請較現時更高職位嘅話，加薪幅度更可以去到30%或以上。當然只係一個大概，仲要視乎行業，經濟環境，公司整體薪酬等等。

Expected Salary可以試多幾次，再慢慢調整

打工仔可以先審視自己嘅工作能力，睇下自己嘅skill set符唔符合職位需要，match到嘅話，就算心目中嘅Expected Salary價位高於市場水平都不妨試下，睇睇自己到底值唔值呢個價。如果一路有Interview，見工表現又唔錯，但偏偏無Offer，咁可能真係Expected Salary問題，之後再慢慢調整都無問題。

獨家秘訣：助你輕鬆加薪Up Up Up!

想你嘅Expected Salary變成Current Salary，最緊要係識得收集數據，了解行業相同職位嘅薪金再作比較！大家可以參考CPjobs 2022年薪酬調查報告，知道市場而家咩價位，自己係咪Underpaid，同HR傾嘅時候都有信心啲啦！「嗱，CPjobs份報告係咁寫㗎，我要求呢個價好合理呀！」。

原地升職 vs 轉工加薪：點做抉擇

最理想梗係有得「升」又有得「加」，但當公司資源有限，大部分會以「升職」取代「加薪」去留住人才，令唔少打工仔覺得「搵笨」決定轉工。只不過，轉工雖然可以爭取更多人工，但同時有好多不確定性值得考慮，都要評估返新公司有冇足夠嘅晉升機會，職銜（Job title）對未來職業生涯有冇幫助，新工作環境適唔適合等等。如果而家你仲未搵到工，有得升職又唔使簽賣身契唔畀走（有啲公司升職要夾硬留多一年先可以走...），有個靚Title轉工都唔錯。

轉工話難唔難，話易唔易，不妨騎牛搵馬，搵啱先走！