情人節，祝有情人嘅幸福快樂！未搵啱對象嘅，希望你遇到個啱嘅！但千祈千祈唔好因為未搵到，而選擇同公司拍拖！

失戀好痛，真正失過戀嘅人都會明白嗰種錐心之痛。突然鋒利的回憶，突然模糊的眼睛，回憶變成最鋒利嘅武器，直到回憶開始淡忘，痛苦先會慢慢減退。同拍拖一樣，如果你將公司視為你嘅談戀愛對象，將自己最好嘅一切奉獻比公司，到咗對方提出分手一刻，你好可能一樣會經歷同失戀一樣嘅痛。

1. 時代唔同了

喺香港嘅職場入面，你喺一啲老牌大企業入面，通常都會發現有一批做咗好多年嘅忠心老臣子。佢地對公司通常都帶有有感情，會幫公司講好說話，再加上享有以往比強積金好嘅公積金福利，佢地都一心做到退休。可能以前嘅公司會比較講感情，但到咗今時今日，「做到退休」已經唔係必然。公司業績唔好，要變臉就變臉。我諗大家都聽過好多大企業喺仍然有錢賺嘅情況下裁員嘅新聞。裁減嘅未必只有新嚟嘅薯仔，當中都會包括好多有返咁上下年資嘅老臣子。我做HR嘅生涯都經歷過金融海嘯時期，當你將封信交畀老員工嘅時候，你可以感覺到佢地嗰種無奈同被背叛嘅感覺，有啲人甚至當場喊出嚟。而家啲公司條數唔靚仔就搵人開刀，始終感情唔可以當飯食。

2. 老細隨時變

一個朝代嘅終結，就係另一個時代嘅開始。如果喺一啲管理層Turnover極高嘅公司入面工作過，你就會感受到嗰種難以適應嘅滋味。每個老細都有佢自己嘅風格、有佢自己嘅發展方向，而且新官上場三把火，佢最需要係幫自己打江山嘅班底。一朝天子一朝臣，無論你幾愛公司，但天子不愛你，到頭來你付出嘅愛都係付諸流水。現實係無論你幾愛公司都好，老細一變，咩都變。

3. 公司好似壞男人

公司有時就好似壞男人一樣，你對佢嘅無條件付出，一年後可能只係換嚟加$120人工。公司好明白一夜夫妻百二蚊嘅道理，呢個世界唔會冇咗邊個唔得。見異思遷係好平常，新人比舊人嘅人工高一截都係常有嘅事。

戀愛係講求雙方無計較嘅付出，但喺職場入面，公司同員工之間永遠出現著計算，愛上公司從來都唔係明智之舉。但唔好愛上公司嘅意思並唔係話對工作唔認真，對於工作仍然要認真、努力，只係應該保持適當嘅距離。我地亦唔可以旨意公司會養自己一世，無時無刻都要增值自己。就算有一日真係比人飛咗，我地都仲大把人爭。