唔經唔覺，第一批「00後」都差唔多時間大學畢業投身職場。近日喺討論區就有網民話自己係職場老Seafood，由intern做到而家Director，想教精職場新貴，列出「6大職場守則」，希望職場小薯唔好中伏！你哋又覺得佢講得啱唔啱呢？
1. 唔好當同事係朋友
同事還同事，朋友還朋友，兩者要分得清楚。同事只係工作上嘅隊友，甚至係競爭對手，喺有危機嘅時候只會推你出去頂，兩肋插刀？背後插你兩刀先真！
2. 唔好對公司有感情
公司只係當你係生財工具，出錢買你嘅知識、時間同經驗，無論你點仆心仆命幫公司，當要炒人嘅時候，佢唔會同你講感情。
3. Part Time先係最惡
Part Time雖然只係一粒齒輪，處理下啲厭惡性工作，但無咗呢個人公司就會覺得麻煩。所以唔使理人點諗，覺得唔開心隨時唔做都OK，公司仲驚過你。
4. 同同事打好關係好過做嘢叻
出嚟做嘢識做人好過識做事，唔需要同同事做好朋友，但要打好大家嘅關係。無咩事嗰陣做嘢順利啲，有起事上嚟做錯咗亦唔會畀人鬧。無關係嘅話，你做嘢幾叻都有人睇你唔順眼。（做人無PR，食__㗎喇。）
5. 人工永遠大於一切
做嘢永遠做人工高啲嗰份，老細同你講升職加人工，唔係即時嘅話佢只係想拖你時間同搵人代替你。有好路數，即走。
6. 有咩事都唔好怯
去到最差都係無咗份工，最緊要面皮夠厚。做咩都表現出處變不驚無有怕嘅樣，同事見到都唔會得罪你。喺職場，打爛嘢都係法定賠$300，淡定。
無論你認唔認同以上嘅觀點，返工都係為咗升職加人工。有好同事的確係bonus，無嘅話亦唔需要摺埋自己。人生幾十年都奉獻畀工作，希望大家都搵到份好工，可以達成自己嘅目標啦！
