唔知大家有無聽過「職場PUA」？不過就算你無聽過，都可能經歷過。
PUA全寫係Pick-up Artist，本身係形容兩性交往嘅一種方式，意思係指兩性交往期間其中一方透過長期嘅精神打壓，令對方變得自卑同自我懷疑，失去自我判斷能力，從而控制對方，達到精神控制嘅目的。
而「職場PUA」就係指上司通過唔同方法打擊或者否定下屬，令下屬失去自信，再俾假希望下屬，促使下屬自願被壓榨，渴望得到上司嘅認同。
係咪好驚自己中咗招呢? 睇下以下幾種常見手段，留意下自己有無中伏啦！
第一招：不斷否定
對人唔對事，不斷否定你做嘅嘢，但又唔會畀實質嘅建議同方向你去改善，淨係想引導你覺得自己真係唔掂，從而令你變得聽話，無條件服從佢。
第二招：美化壓榨
上司會透過「睇好你㗎」丶「我鬧你都係為你好」丶「最信得過係你」丶「呢啲全部都係機會嚟㗎」... 呢啲句子去畀假希望你，令你相信喺公司有前途，但其實只係上司用嚟美化壓榨嘅言語。
第三招：製造恐慌
不斷向你灌輸出面風大雨大，辭咗職就好難再搵到工嘅信息，暗示你留返喺公司先係最好，然後就可以理所當然咁壓榨你。
第四招：設立無法完成嘅目標
派啲時間緊急同複雜嘅工作畀你，但唔提供任何指導同幫助，但當你完成唔到嘅時候，佢就會嫌棄你工作效率慢，導致你失去自信。
如果睇完發現自己已經中咗招，就要用呢幾種方法去擺脫困境！
一，肯定自己嘅價值：
上司嘅批評並唔係唯一嘅標準，唔使因為一句說話而失去自信。
二，多啲同朋友家人傾訴：
人與人之間溝通除咗可以幫自己舒緩部分心理壓力外，佢哋仲可以幫你分析畀意見你，令你可以從唔同角度審視自己嘅能力。
三，多留意外面嘅環境：
了解自身嘅市場價值，避免上司無情嘅壓榨，出面可能無你想像中咁差！例如：可以嚟呢度睇下自己行業同職位嘅市況，做好轉工嘅準備～
四，唔好怕辭職：
俗語有云「東家唔打打西家」，公司同上司都只係你人生嘅一小部份，唔需要留喺一間公司一世，做得唔開心點解唔轉工？
