喺見工面試嘅過程入面，面試官除咗想充分了解求職者嘅工作經驗同過往業績之外，仲想知道佢係一個咩人，喺職場上會點處理唔同嘅問題。佢哋會問：「不如講下你有咩優點同弱點？（What are your strengths and weaknesses?）」呢條問題看似簡單，但好多打工仔都唔清楚點樣答先過到關。

常問唔一定係必問，但如果你提前準備好回答呢條問題嘅背景、台詞同埋當中重點，對你嘅面試將會有好大嘅幫助。

講優點先定弱點先？

當然有面試官會一條問題拆開問，但如果係同時問「優弱」，你可以講咗「弱點」先，話就話講「弱點」，但過程中可以讓你講下點樣去改善，畀人見到你面對困難嘅積極態度，有個好嘅開頭畀自己。

問及優點同缺點，你可以利用過往喺職場上嘅經歷同埋例子去增強說服力，而內容必須切合你申請嘅職位需要（可以留意Job description有無講佢需要一個咩人）。以下有啲例子：

「性格特質」相關：

「我好想每件事都做得完美，所以我會好push自己，同時會不自覺push其他人同我一樣standard。但我發現呢個模式會令到自己同同事都好辛苦，所以我嘗試尋求共識，同同事多啲溝通，了解自己嘅standard唔等於絕對，做嘢開始無咁大壓力。而同時，追求完美會提升咗對各種問題嘅敏銳度，見到有唔妥可以即時提出，解決問題。」

「技能及習慣」相關：

「我係一個problem solver，同時自信可以按時做好所有工作，唔做deadline fighter。有一次公司搵我form team做一個大project，其中一個task有阻滯令到其他task需要postpone，但我無意識去搵teammate幫手，導致差啲唔可以按時出街。嗰次經歷令我知道自己無能力解決晒所有問題，同時as a team leader，應該知道點樣分工，同埋遇到問題可以拋出嚟brainstorm，咁先係最好。」

通常有咩「弱點」可以講（同時容易突顯自己嘅成長）？

• 技能上經驗不足（靠進修解決）
• 分派工作能力較弱（成為Manager先決條件）
• 做「Yes man」唔識「Say No」（了解自己能力同加強溝通技巧）
• 完美主義（要小心，講得唔好隨時有反效果
• 做嘢太Safe（點樣學習跳出框框）

「優點」點樣表達先係「自信」而唔係「自大」？

面對呢個問題，求職者最大嘅困難係點樣喺「自信」同「謙虛」中取得平衡，同時唔讓其他人覺得自己「自大」。同講「弱點」一樣，可以利用你嘅職位，經歷，技能，加上背景去描述。

「性格特質」相關：

「我好鍾意同人合作，Teamwork對我嚟講好重點。喺過往嘅日子，我管理過唔同嘅團隊，同唔同Department嘅同事合作，每次都能夠有新嘅火花，亦令我可以學到喺自己崗位上學唔到嘅嘢（Project例子）。喺管理團隊嘅呢幾年，為公司提升咗20%嘅盈利，亦減少10%同事嘅Turnover rate。」

「技能及習慣」相關：

「我係一個focus on details嘅人。喺做project嘅時候我會睇清楚每一個細節有無問題，當有問題嘅時候可以即時解決，同時可以提升整體團隊對細節嘅敏銳度，減少出錯。因為咁，公司分派畀我嘅project規模亦比較大。」

以上都係例子畀大家做參考，你可以根據自己嘅經驗能力做修改。同時，「講故仔叻」唔係天生，需要多練習。而你亦需要留意以下幾點：

• 必須誠實！必須誠實！必須誠實！（好重要所以講3次）
• 唔好誇大事實（永遠有跡可尋）
• 優點唔使多，一兩個就夠（太多反而唔夠集中）
• 唔自大，但唔需要太謙虛（反而無說服力）

如果你唔知自己有咩「優點」，可以試下問下你嘅同事（當然要好信得過好Friend，但唔容易⋯⋯），又或者可以回想下你份Appraisal嘅comment。當然，「優點」都不外乎係呢啲：

• 有領導團隊能力（對於Manager grade比較有幫助）
• 對工作 / 行業有熱誠（想更了解點樣喺行業入面做得更好）
• 決定瞬速而且正確（反應快，唔拖泥帶水）
• 有團隊精神（唔係One man band，同時識同人合作）
• 有行動力 / 執行能力（唔係紙上談兵）

記住，你嘅答案會體現到你係一個咩人，你過去嘅「弱點」會令你成為一個更成熟嘅人；你現在嘅「優點」會顯出你點樣適合呢個職位。即刻準備你嘅unique story啦！