偏見，可謂每個人唔多唔少都有的陋習。正所謂「呢度唔係法庭，我雙眼就係法庭」，你咪以為只有師奶劇李司祺才這樣說，實情辦公室裏，都不知幾多呢種人。

約莫十年前，有一個族群，簡直係「懶惰、唔捱得、唔積極、唔用心、不負責任」的代名詞，呢個族群叫「90後」。來到2021年，90後都己經30歲出頭，「懶惰、唔捱得、唔積極、唔用心、不負責任」的罪名順理成彰由「千禧後」來繼承。

「啲千禧後未做完嘢就走！六點零咋喎，好夜咩？」

「唔返工都起碼打個電話交帶聲丫！求其Send個WhatsApp就算，仲要用火星文，佢地當返工係Book枱食飯話唔去就唔去？」

「做唔掂又唔一早講！拖到最後一刻才講？想幫佢補鑊都趕唔切啦！」

先不論上述處境背後有沒有苦衷，就當真的是當事人錯晒好了。問題是，會犯上述錯誤的人，不一定是90後或千禧後好嗎？縮骨、卸膊、冇交帶，自我中心、不顧大局，固然可以出現在後生仔身上，也一樣會出現在Old seafood身上。

有時，我覺得，同樣係犯錯，後生仔尚且可以「傾吓偈」，Old seafood反而恃住自己資歷深，睬你費事兼關人隱事！對唔治，唔妥Old seafood，可能也是辦公毒男自己的「偏見」。由此可見，要消除偏見，幾咁唔容易。

懶係政治正確阿媽係女人地講句：「盡唔盡責睇性格，唔關年紀事」。唔信？睇吓你上司，佢地夠年紀大「食鹽多過你食米」啦，又唔好見佢地做嘢盡責？咪又係打仗搏命唔見佢，有功勞時搶頭位！

以上文章刊於《招職》。