成日聽人講jumpy，究竟jumpy嘅定義係咩？呢個字通常係指一個求職者轉工頻繁，而且每份工都做唔過2年。喺「古時」jumpy嘅人被視為罪大惡極，但經歷疫症之後，不論係市場環境定係打工仔嘅心態都出現咗好大變化，轉工轉得密已經愈來愈普遍。

而轉工嘅原因有好多，例如對工作嘅不滿、同上司同事唔夾、又或者係人工唔識加等等原因都會令我哋轉工。另外，轉工亦可以係被動，例如因為疫症，導致行業萎縮，職位被消失等等。

講咗咁耐，即刻睇下轉工jumpy有咩好！

1. 人工高啲

轉工係一件好麻煩嘅事，好多嘢都要重新適應，而令你可以克服呢啲障礙嘅就係人工嘅差距。轉工永遠係升職加薪最快最直接嘅方法，好多打工仔轉工，無非係因為人工加得少，升職升得慢，與其等老細action，不如自己做主動嗰個。（唔會特登轉工搵少啲掛？）

2. 發展好啲

一個人喺一間公司嘅發展潛力係同職位掛鉤，喺細公司/ Startups咩都要做，可以試多啲新嘢，但資源有限，技能上雖然會一知半解，但可以鍛鍊反應同市場觸覺；而喺大公司嘅職能相對會拆得好細，技能要求比較高，雖然工作比較單一，但資源同支援比較多，項目規模大，睇嘢亦會宏觀啲。而轉工就係畀你喺唔同嘅環境入面學習，幫你喺職涯上有更好嘅成長。

3. 機會多啲

試諗下你喺一間公司工作5年，除非間公司喺經營模式上有好大變化，甚至搞上市、有投資者注資發大嚟搞，否則你做嘅嘢就係得眼前咁多。想試多啲新嘢，學多啲新嘢，等自己更清楚發展方向，同埋行業發展，轉工係唯一途徑。（新聞得表面嗰浸，朋友亦唔會分享到太多業內資訊）

4. 適應力進步快啲

喺呢幾年，我哋經常講一個term：可轉移技能（transferable skills），例如溝通技巧，個人學習能力等等。而每一次轉工，你就會學習另一種新嘅工作模式，亦有機會同新嘅同事、工作夥伴合作，你嘅溝通能力，學習能力都會（被迫）快速提升，去適應一個新環境，呢啲都唔係stable喺一間公司可以做到。

5. 工作環境好啲

轉工除咗想升職加人工，第三個主要原因就係想要個好啲嘅工作環境。所謂嘅環境包括Office嘅舒適度，同事嘅契合度，工作氛圍，公司福利，Career path，管理風格等等。唔試過唔知出面嘅公司係同而家做緊嗰間咁唔同！

下次再同大家探討下有咩唔好！