四年一度嘅世界盃又嚟喇，今屆世界盃將會喺卡塔爾舉行，直播時間同大家平日睇英超西甲差唔多：分組賽時間就晒打工仔時間，分別係夜晚6點，9點，12點及凌晨3點；16強，8強同4強則係夜晚11點及凌晨3點；而最開心就係12月18號嘅決賽，當日夜晚11點就有得睇（睇完都係點零鐘）！

作為球迷嘅你，梗係唔會想錯過任何一場比賽啦，但日日睇到凌晨3點，第日捱住眼瞓返工真係命都短幾年。為咗睇波睇得舒適，有人會請病假，索性遲到，呢啲都係盡在公司HR嘅掌握之中。有見及此，有啲公司索性開放會議室做睇波房，唔離開公司，咁咪唔會遲到囉！不過睇波都係講氣氛，約埋三五知己喺屋企睇或者出街睇先係最開心。所以，為咗安落睇波而唔影響工作，事前準備功夫你要做足！

1. 計劃定點樣準時收工

距離開波仲有個幾月，係時候計劃下手上工作嘅時間表，盡量預先安排好，睇波時間唔好撞咗你要捱夜睇波嘅時間，以免無精神影響工作表現。不過計劃總係追唔上變化，但係有準備永遠好過無準備嘅！（老細：「如果你平日都係咁企理就好喇。」）

2. 傾下有無彈性工作安排

如果老細係球迷，平日又有計傾，關係好，不妨問下有無可能晏少少返工，遲少少放工（例如朝10晚7）；甚至安排在家工作（work from home）。但如果老細係工作至上，你就要考慮直接攞假補眠，捱眼訓唔夠精神做錯嘢仲衰。事關接近年尾，都開始appraisal...

伸延閱讀：

【Appraisal大作戰】 打工仔做Appraisal 必備10個錦囊

【Appraisal大作戰】 90條Appraisal實用評語例句 中英對照唔使煩

3. 乘機拉近同事關係

四年前可能你仲未喺度做，加上疫情又要分A/B team又要長期work from home，想同同事加深認識都唔係咁易。今年世界盃年，可以乘機增加話題，約埋一齊睇波，拉近距離之外仲可以收下風，大家friend啲，日後做嘢都順利啲啦！（諗定轉工另計，轉工傳送門：按此！）

4. 搵定邊度有得睇直播

每年世界盃都有商場會進行現場直播，疫情會唔會改變呢個「傳統」真係未知。留意定邊個商場有波睇，有好嘢食，唔使浪費時間轉場走嚟走去，爭取時間擔櫈仔霸頭位！